كيف أستغل الوقت لتحقيق النجاح

باش تعرف كيفاش تستغل الوقت و تحقق النجاح خصك تجاوب على واحد السؤال محوري اللي هو : كيفاش نعرف باللي حياتي ضايعة ؟

حياتي تضيع فاش  متتبقاش نفكر فراسي، مثلا تنفكر فالتليفون حتى وأنا يلاه فقت من النعاس، فالوقت اللي خاصني نركز فيه على أمور أكثر أهمية.. أمور يمكن وقتها الوحيد هو داك الوقت من الصباح.. منين يلاه تنحل عيني...

حياتي تضيع فاش متتكونش عندي القدرة على نقول لا.. لا للبلانات المتكررة ديال الأصدقاء.. لا للأفلام و المسلسلات كل ساعة و كل حين.. لا للتلفاز و القنوات الفضائية.. لا  لأي حاجة عارفها تضيع وقتي و جهدي بلا فائدة... نهار نقدر نقول لا.. غادي نربح بزاف ديال الوقت.. و غادي نرتاح نفسيا...

 حياتي تضيع فاش تيولي عندي كل الايام متشابهة كيف السبت كيف الأحد كيف الأعياد.. تتحس بالملل.. حيت معنديش أهداف مرحلية.. كل ما نحقق هدف منها.. تنفرح.. و تنبغي نرتاح.. و تتولي عندي الرغبة أكبر ندوز لهدف مرحلي آخر.. كل يوم جديد.. لازمو هدف مرحلي على أقل تقدير... الله يجعلو يكون غير نطوي فراشي.. و نجمع البيت اللي تنعس فيه..

حياتي تضيع و أنا مقابل الواتساب.. ميسجنر.. و غيرها من منصات التواصل اللحظي.. تنتسى شكون غادي سيفط لي ميساج.. علاش ماسيفطش لي ميساج.. علاش متكونيكطاش.. ياكما بلوكاوني... و تتجي تشوف تتلقى ساعات دازت غير فاللاشيء...

حياتي تضيع  أنا مقابل سطوريات و الفيديوهات ديال ناس آخرين معيشيني فالأحلام و مخرجيني من الواقع.. و هو فالأصل خاصني نعيش الواقع باش نحقق الأحلام ديالي... و هادشي تيخلني كاره الوضعية.. و العباد.. و البلاد.. و التاريخ و الجغرافيا.. لكن واش غادي تتغير شي حاجة ؟ اللي غادي يتغير فعلا هي الشخصية ديالي الا ركزت عليها و خدمت عليها بعيدا عن اي حاجة خارجية.. و لو فقط نبتاسم فوجه والدي او وليداتي او الزوجة ديالي.. و نقول ليهم الحمد لله اللي انتوما معايا..

حياتي تضيع فاش تنقيس نفسي بميزان ماشي ديالي.. سولو السبع علاش مهموم و حزين.. قال ليهم متنعرفش نطير فحال الصقر.. و القرد قال لي باللي القوة هي تعرف طير..و انا متنعرفش..  هنا القرد ضحك على السبع.. علاش تخلي القرد يضحك عليك.. علاش تقيس نفسك بميزان واحد آخر.. كل واحد منا عندو ميزان خاص بيه.. كاين اللي عزيز عليه يزور المرضى و الناس المسنين.. و هادشي مزيان و فيه الأجر.. و كاين اللي عزيز عليه يدير الخير مع الناس و حتى هادي مزيانة و فيها الاجر.. و مكاينش اللي يقول ليك باللي هدا احسن من الاخر.. كل واحد تيدير فيهم الخير على حسب قدراتو و امكانياتو.. قبل ما تقارن نفسك بشي حد.. تعلم ان كل واحد منا فيه ميزة تتميزو على الآخر.. فحال السبع و الصقر و القرش.. الأول متقدرش تجاريه فالوطا.. و الثاني متقدرش عليه فالسما.. و الثالث متقدرش تغلبو تحت الما..

حياتي تضيع فاش تنبقى لساعات و ساعات في جدال طويل على الفيسبوك.. لا لشيء باش نبين الحق... نقول ليك واحد الحاجة... جيب لي أحسن و أفضل و أروع حاجة شفتيها و حبيتيها فهاد الفيسبوك.. أو فالأنترنت.. و حسيتي باللي هادشي واعر و عظيم.. فاش تتفكرها دخل وشوف واش مكانتش عليها انتقادات و سب و شتم.. اللوحات الفنية العالمية كالموناليزا مثلا.. عليها انتقادات.. السمفونيات ديال بيتهوفن حتى هي كاين اللي تيشكك فيها و انتاقدها... هناك صور و فيديوهات لرضع يلاه عندهم اياما معدودة فهاد الكوكب حتى هوما ما سلموش من الانتقادات و التاأويلات... خاصني نتعلم وقتاش نتكلم و وقتاش نصمت...
 حياتي تضيع فاش تنكونش عارف اشنو خاصني ندير فالنهار ديالي.. شنو المهمات اللي عندي فهاد النهار... أصعب سؤال اللي متنعرفوش نجاوبو عليه واحنا فالفراغ هو شنو خاصني ندير من بعد ؟ و كل نهار تنرجع و نقول ضيعت نهار عوتاني..

حياتي تضيع فاش تنرفض فكرة المطالعة و القراءة.. فاش تنبغي نقنع راسي باللي القراءة شي حاجة تافهة.. شي حاجة غير تتمرضني كثر ما انا مريض.. بالعكس مكاينش احسن من القراية.. مكاينش ما احسن تشد كتاب بين يديك و تقرا فيه.. الدماغ الا مدربتيهش على القراية غادي يبقى ضعيف و معندو قوة.. الا تتخبط الحديد فلاصال و تتفركع ليا البيسابس و الصدر.. فخبط ليا الكتوبة فالدار و خلي داك الدماغ حتى هو يتفركع معرفة و ثقافة...

حياتي تضيع فاش تنشوف الفرص تدوز من حدايا وحدة تابعة الاخرى و انا مقادرش نتحرك.. باقي مبلوكي فواحد التجربة عشتيها شي عشر سنين هادي و منجحاتش.. و خايف حتى هاد التجربة الجديدة متنجحش.. ياقي مبلوكي حيت ولد خالت خو مرت جيرانكم حتى هي جربات نفس المشروع و منجحش ليها.. مبلوكي حيت قالوا ليك هاد البلاد مبقا فيها ما يدار.. مبلوكي حيت قالو ليك باقي صغير.. مبلوكي حيت قالو ليك صافي كبرتي على هاشي.. مبلوكي حيت معندكش مع اللونغلي.. معندكش مع الفرونسي.. مبلوكي حيت تتسنى البرد يخرج.. مبلوكي حيت الصيف هادا كلشي مسافر... عرفتي شنو هاد البلوكاج راه عندو فالحقيقة سب واحد هو الادمان على الراحة الا مشيتي تتعاطيتي لهاد المخدر اللي سميتو الراحة و الله حتى تيصعاب عليك تبعد عليه... الراحة و الدنيا هانية.. هي المقبرة ديال الأحلام ديالنا و نجاحاتنا فهاد الحياة...