ما هي عقدة سندريلا ؟
اتأسف من إخوتنا العرب فالموضوع مشروح بالدارجة المغربية و للإشارة فهي بسيطة جدا في الفهم .
عقدة سندريلا أو cindrella complex هي من العقد المشهورة في علم النفس و كتكون فقط عند البنات. وبما اننا مجتمع ذكوري فأكيد هاد العقدة معششة عندنا. كلنا كنعرفو القصة ديال هاد الاميرة لي كبرات تحت العذاب النفسي و الجسدي ديال مرات باها و جوج خواتاتها و فالأخير تزوجات أمير بالمساعدة ديال السباط السيحري. ومن هاد القصة خداو علماء النفس سمية العقدة. التعريف ديال عقدة cindrella هو واحد الخوف مدفون فاللاوعي ديال البنت و كيخليها كتخاف من الاستقلالية independence و ديما محتاجة للعنصر الذكوري (الأمير) باش تتقدم فحياتها، و بلا بيه هي مكتسوا والو.
سنة 1981، صدرات عالمة النفس المشهورة colette Dowling واحد الكتاب سميتو (Cinderella complex) ...عقدة سندريلا
Colette Dowling ف كتابها كتناقــش قضية الفارس الأسطوري، وكتشوف ان نسبة كبيرة من بنات هاد العصر عندهم عقدة سندريلا، وهي أنهم رغم مشاكلهم وظروفهم الصعبة، كيكرســوا كاع طموحاتهم وامنياتهم في البحث عن فارس احلامهم اللي غايجي ينقدهم من الهم اللي هما عايشين فيه! كيفضلـوا يحلموا ويبنيو في خيالهم اوهام عن المنقد، البطل،... وكيعيشـوا على أمل انه في يوم من الأيام غادي يجي...الى مجاش غتبقى كارثة!
Colette Dowling كترجَّعْ سبب تفشي هاد العقدة النفسية في سلوكيات نسبة كبيرة من البنات للتربية الغلط!...كتقول بأن هاد العقدة كتبدا فالصغر : فالولد فصغرو كيلعب العاب على انه مستقل و متحكم فالعالم في حين البنت كتبقى تحلم و تسنى يجي الامير الوسيم راكب على عود يخطفها و يديها للقلعة يتزوجها و يعيشو فسعادة و سلام.... حبسي حبسي، هاد شي كاين غا فالغرب الكافر اما حنا فالبنت كتزاد من صغرها لوظيفة محددة وهي الزواج، و كتبقى تساين ميمونها امتى يجي يكون أمير ولا وزير و لا عطار ماشي موهيم، الموهيم هو يجي لأنها ببساطة ماقادراش تستقل فكريا/ماديا. يعني ان شق كبير في تأسيس البنت وهي صغيرة كيكون قائم على فكرة انها ديما محتاجة اللي يساعدها او يحميها، محتاجة للوصي او المسؤول.. كذلك كيتم توجيهها مجتمعيا وإعلاميا ناحية الاهتمام بشكلها ومنظرها وحالتها الخارجية اكثر من اهتمامها بعقلها وفكرها ومستقبلها العلمي، وكاع هادشي باش تلفت نظر فارس أحلامها وتعرف تصيَّد مزيان!! وكل مرة تلاقا مع شي فارس كيولي بحال شي امتحان بالنسبة ليها، خاصها تنجح فيه بأي وسيلة!! كاع هاد الحوايج كتراكم معا بعضها وكتسبب الcindella complex، المشكلة كتبدى تظهر منين الخوف من عدم العثور على المنقد او الفارس كيبدى يترسب لروح البنت!! اصوات خارجية متمثلة ف الأسرة والأقارب والجيران وأصوات داخية متمثلة في قلق البنت وتوترها على تأخر هاد الفارس !! هنا تدرك المسكينة الخطر بعينو.. وكتبدى تخيل ان حياتها وطموحاتها انهارت ومشا عليها تران ، هي من غير هاد الفارس مغديش تقدر توصل لداكشي لي بغات! وكدخل فواحد الدائرة كل ما الخوف كيزيد، كيزيد معاه فقدانها للسيطرة على نفسها، لغاية ما تتحطم كاع معالم ثقتها بنفسها وكتصبح ضحية هاد العقدة.
الكاتبة Colette Dowling مكانتش متضايقة من سندريلا حينتاش بغات فارس أحلامها او أعجبت بيه او حتى انها قررات تعيش معاه بقية حياتها، إنما كانت متضايقة من سندريلا حينتاش عاملة بحال المشلولة فكريا وعقليا، ومسلوبة الإرادة ...كانت ممكن تفكر في تطوير نفسها، تشتغل على امكانياتها او تحسين ظروفها، كانت ممكن تفكر كيفاش تجيب حقها من مرات باها اللي ظلماتها او تعترض على قهر خوتها غير الاشقاء ليها، إنما هي فضلات في انتظار الفارس باش يجيب ليها حقها... والسؤال المطرح دبا، نفترضو مكانش جاي هاد الفارس؟! او جا ومشا عاوتني، او جا وطلع شي فارس عيان وممل؟! اشنو المعمول ...؟؟
Colette Dowling كذلك كتقول فهاد الحالة ان للأسف من توابع عقدة سندريلا، ان بزاف ديال البنات كيفضلـوا التواجد في علاقة مؤلمة او غير مريحة بالنسبة ليهم على انهم يفضلو يبقاو بلا رفيق او شريك، بالمعنى الاصح التشوه اللي حصل في الشريحة الكبيرة من هاد البنات وصل بيهم انه يخليهم يتقبلو فكرة التواجد مع فارس ممل وضعيف على انهم يعيشوا بلا فارس!!! وعلى هادشي كتمنى Colette Dowling من اي الأنثى في اي مكان او ف اي زمان، تدرك قوتها واهميتها الحقيقية، ديك ساعة غادي تعرف بأنها هي اهم من الف فارس.
مجتمعنا كيما قلت ذكوري، وخا البنت تحاول تمرد ضد هاد الفكرة، كتلقا صعوبات، خاصة من جيهت الام لينوغمالمو خاصها تكون مدعماها ولكن كيجي العكس تماما وراكم عارفين الجملة الشهيرة ديال غالبية الأمهات "أش ديري بشي قراية شوفي ليك شي راجل يسترك" هاد الجملة كتلخص كاع ليقلناه و هي حقيقة مرة، فالفتاة فالوقت ليتقلب فيه على الاستقلالية و التخلص من الهيمنة الذكورية ، كتبقى تقلب على راجل و كتخسر امكانية تحقيق ذاتها و طموحاتها.
ب.س لأصحاب الفكر الدوغمائي المحافظ : الاستقلالية هنا كتعني استقلالية الفكر بمعنى البنت تحصل واحد الفكر يطور شخصيتها، و استقلال مادي يعني خدمة او مورد رزق، اما دخل شكلي فالعكلي وتقولي كنحرض على الفساد و التحرر وداكشي فأنا بريء.
