من هو مكتشف فصائل الدم

كارل لاندشتاينر مكتشف فصائل الدم

اجي معايا نديروا رحلة صغيرة ونتعرفوا على أهم عنصر في حياتنا، للي بلا بيه ما يمكن لا انا ولا انت ولا حتى واحد يبقى عايش.
باختصااار ضيف الشرف اليوم هو : الدم.
أول شي خصنا نعرفوه، هو أن الدم كيتكون من :
1- البلازما: وهي المسؤولة على نقل الماء والأملاح، ومختلف المواد الغذائية ( سكريات، فيتامينات،هرمونات . . . )
2- خلايا الدم الحمراء: هي للي كتوصل الاوكسيجين للانسجة وكتاخذ منهم ثنائي أكسيد الكربون.
3- خلايا الدم البيضاء: وهادي خدمتها بحال العساس، كتبقى دايرة اطونسيوا وحاضية الجسم من أي نوع من البكتيريا والجراثيم كتكافح الالتهابات. هي والمناعة صحاب.
4- الصفائح الدموية: خدمتها هي تمنع النزيف فحالات الجرح.
تسنا . . تسنا، جاك هادشي ممل ياك.
اوا أجي نعاود ليك حكاية.
كان يا مكان في قديم الزمان. . . .
كانوا الناس كيموتوا بزاف بسبب النزيف، وفاش اكتشفوا الاطباء القضية ديال امكانية نقل الدم من شخص لآخر، كانوا ديما كيتصدموا علاش شي وحدين كيبقاو عايشين، وحدين كيموتوا من بعد وقت قليل من استقبالهم للدم.
علاش زعما هادو كيعيشوا وثانيين كيموتوا
السر شحااااال وهو محير الاطباء والعلماء.
حتال سنة 1901 جا واحد السيد الله يجازيه بالخير وكشف لنا السبب والسر المحير.
الطبيب النمساوي كارل لاندشتاينر
Karl Landsteiner
اكتشف ان دم الانسان واخا كايبان لينا سائل احمر عند الكل، ولكن في الحقيقة راه مختلف.
اكتشف بلي كاينين جوج الأنواع د انتجين antigen. وللي سماهم A وB.
وللي كيكونو لاصقين فخلايا الدم الحمراء، وهوما للي كيحددوا نوع الدم للي عندك ==》 الفصيلة.
في 1901، كارل قال بللي الخلايا الحمراء سوى:
- تكون لاصقة فيها الانتجينات A = الفصيلة A
- أو لاصقة فيها الانتجينات B = الفصيلة B
- أو ما تكون حتى وحدة = الفصيلة O
من بعد عام، يعني فسنة 1902، اكتشف كارل بللي كاينين ناس عندهم الانتجينات بجوج. وبهذا تزادت الفصيلة الرابعة:
- الخلايا الحمراء لاصقة فيها الانتجينات A و B = الفصيلة AB
من بعد سنين اكتشف كارل حاجة أخرى وللي هي عامل ريزس Rh Factor.
هاد البروتين/ الانتجين كاينين ناس عندهم، وكاينين وحدين ما عندهم.
داكشي لاش قرروا يزيدوا (+) للناس للي عندهم، و (-) للناس للي دمهم مافيه هاد البروتين.
دابا ولى عندنا 8 فصائل الدم.
O-
O+
A-
A+
B-
B+
AB-
AB+
نعاودوا نطرحوا السؤال من جديد:
- علاش الناس كانو كيموتوا فاش كيتنقل لهم الدم من شخص آخر؟
السبب هو أن كل انسان فينا إذا كان عندوا انتجين لاصق فالخلايا الحمراء، ففي البلازما كيكون عندوا مضاد للانتجين الآخر.
باش نفسروا مزيان:
▪ الفصيلة A : عندها انتجين A في الخلايا الحمراء (و مضاد antibody للانتجين B في البلازما)
▪ الفصيلة B : عندها انتجين B في الخلايا الحمراء (و مضاد antibody للانتجين A في البلازما)
▪ الفصيلة AB: عندها انتجين A و الانتجين B في الخلايا الحمراء (و ما عندها حتى مضاد antibody في البلازما)
▪ الفصيلة O : ما عندها حتى انتجين في الخلايا الحمراء (عندها مضاد antibody للانتجين A ومضاد للانتجين B في البلازما)
اصحاب عامل ريزس سالب مايمكن ياخذوا الدم من عند الموجب، حيث دمهم ما فيه ذاك البروتين.
إذا دخل ليهم هاد البروتين كيعتابروا الجسم دخيل وكيقاوموا بكل ما أوتي من قوة ( الحرب).
(عقلوا على هاد المعلومة مزيااان انحتاجوها لتحت)
مثلا:
الفصيلة O- كتقدر تعطي لكلشي حيث ما فيها حتى انتجين.
ولكن اتاخذ غير من عند O- (نفسها عزيزة وما كترضى تشد من عند حد) حيث في المناعة عندها مضاد A وB وما عندها بروتين عامل ريزس.
الفصيلة B+ كتعطي لاختها B+ و AB+.
وتاخذ من عند B- و O+ و O-.
الفصيلة AB+ هادي غا للي عطاها تقول بسم الله، ما مسوقاااش عايشة بيخير peaaaaace
جدول نقل الدم بين الفصائل مرفق فالصور.
المعلومة الاخرى للي خصنا نعرفوها، أن الدم للي كيجري فعروقنا حتى هو كنورثوه من والدينا، بحال الطول، لون العينين . . .
اتلقاو في الصور جدول بمختلف الحالات دفصيلة دم الأبوين وفصيلة دم أطفالهم المحتملة.
مثلا إذا كنت انت عندك فصيلة AB ومرتك عندها AB حتى هي، فمستحيل يكون عندكم ولد فصيلته O.
نفس الشي إلى كنتوا بزوج عندكم O؛ ولادكم غادي يكونوا كلهم O.
الى بغينا نعرفوا علاش؟ ايخص نمشوا نقراو شوية على الوراثة المندلية.
باش ما نكثر عليكم هنا.
للي عندوا فضول يعرفو أكثر ما عليه غير يكتب فجوجل الوراثة المندلية لفصائل الدم واستمتع بالعلم.
بالنسبة لعامل ريزس في الزواج كاينين 4 حالات وحدة فيهم هي الخطيرة.
1- الزوج موجب والزوجة موجب
2- الزوج سالب والزوجة سالب
3- الزوج سالب والزوجة موجب
4- الزوج موجب والزوجة سالب.
الحالة 1 و 2 ما كيكون حتى مشكل لان عامل ريزس متشابه.
الحالة 3 حتى هي ما فيها مشكل كيما قلنا من قبل : أصحاب الدم الموجب كيقبلوا الدم السالب.
لكن فالحالة 4؛ فاش كتحمل المرأة صاحبة الدم السالبة زوجة رجل دمه موجب.
فالجنين كيورث بروتين عامل ريزس من الأب.
هاد المرأة سالبة في بطنها جنين موجب. غالبا فالحمل الأول ما كيوقع والوا.
ولكن أثناء الولادة كيتسرب البعض من دم الجنين للأم.
ولأن نسبة الدم المسربة قليلة فجسم الأم كيقاوموا، وكينتج من بعد مصل مضاد قوي ليه.
وكل مرة غادي تحمل هاد الأم، جسمها بلا ما تعيق غادي يقاوم الجنين للي دموا موجب وكيعتبروا دخيل عليه وكيدمر ليه الخلايا الحمراء تاعوا.
في أغلب الأحيان كيموت الجنين.
اشنوا الحل إذن؟!!
الحل هو أن هاد الأم بعد كل ولادة خاصها تحقن ابرة فيها مصل مضاد هو للي كيتكلف بمقاومة ذاك الدخيل، ويخلي المناعة طرونكيل وما على بالها والوا.
بحال ذاك خونا للي دخل لداركم وحصلوا خوك سلخوا عصا وعلمكم كاملين باش تعقلوا عليه مزيان، غير تشوفوه المرة الأخرى تهجموا عليه كاملين.
المصل المضاد للي فالحقنة هو ولد الجيران للي تلقى ليه عند الباب وجرا عليه، وخلاكم هانيين عايشين في سلام.
كنصيحة قبل الزواج خاصكم تكونوا عارفين فصيلة دمكم. خصوصا البنات.
كمعلومة أخيرة: أصحاب Rh- راكم قلال ونادرين.
لأن أصحاب Rh+ كيمثلوا أكثر من 80%.
The RH-negative is much more rare than the RH+positive.
So, Believe in yourself cuz you have a rare blood.
😅😅😅😅
معلومة بعد الأخيرة: هذاك السيد للي هضرنا عليه فالأول، عقلتي عليه. . . اه . . اه؛ ذاك الطبيب للي سميتوا كارل لاندشتاينر، فراسك هو للي فاز بجائزة نوبل للطب سنة 1930.
بان ليا عييتوا، يلا بسلاماااااا.