تجربتي في علاج الحساسية و الجيوب الانفية بالفيتامينات

موضوعنا اليوم هو عن تجربة شخصية لسيدة مصرية تغلبت على مرض الحساسية و عالجت الجيوب الانفية اعتمادا على تقوية المناعة باستخدام الفيتامينات ، و هذا تصريحها :
 للأخوة اللي سألوا عن المكملات: الفيتامينات اللي أخدتها: فيتامين د ١٠.٠٠٠ نوع مستورد اسمه puritans pride. وبعد ما النسبة اتزبطت مفروض نستمر على جرعة بسيطة لأنها بتنزل تاني لو بطلنا. ومعاه كنت باخد نوع مغنيسيوم مصري اسمه سبازماج. للأسف دلوقت ناقص. اللي عايز مغنيسيوم ممكن ياخد إبيماج أعتقد دا أفضل المتاح في السوق ومش أكسيد. أنا تابعت بروتوكول علاج فيتامين د مع جروب أمريكي. بيوصوا إن يتاخد معاه مغنيسيوم علشان يحسن امتصاصه، وكمان علشان يحمي الجسم من التكلسات في الكلى والشرايين. مابنصحش بالجرعات الخرافية للفيتامين د زي حقن ال ٥٠٠.٠٠٠ كل شهر. حرام كل العبء دا على الكبد بشكل مفاجيء. ولما تبطل بردو النسبة هتقل. انا أخدت علبة واحدة من النوع اللي قلته، رفعتلي النسبة من ٧ ل ٧٨ في تلات شهور. كبسولة واحدة يوميا بعد وجبة علشان بيحتاج دهون.
تاني حاجة مالتي فيتامين. أخدت كيروفيت. ممتاز وفيه عناصر كتير جدا. باخد فترة وأبطل فترة علشان أريح الكبد. ولما واظبت على العصير بطلته خالص.
ثالثا حديد. كان عندي أنيميا ٩ .. أخدت حديد فيروجلوبين ولاكتوفرين لاكتيول فورت لحد ما بقت النسبة ١١.٧
دي الحاجات اللي واظبت عليها. ومؤخرا زودت المغنيسيوم المستورد بس دا مش متوفر في مصر، اسمه ناتشريللو naturello magnesium glycinate لو حد له قرايب بره ممكن يجيبه، ممتاز جدا وحسيت بفرق شاسع خصوصا في الصداع.
معلش أنا عارفة إن الموضوع مكلف ماديا شوية خصوصا الحاجات المستوردة، بس إحنا كدا كدا بنصرف على مسكنات وبخاخات ومضادات حساسية ومضادات حيوية. نجرب نصرف شوية على بناء مناعتنا وتحسينها. النتيجة بتكون أفضل بكتير.
موضوع طويل شوية ف اللي مش فاضي ميقراش 😊
طيب يا جماعة كان فيه أخت بتتكلم عن إنها أخدت فيتامينات والحساسية اتحسنت. عايزة أقول إن دي مش حالة واحدة. وإن فعلا العناصر والفيتامينات بتفرق جدا. تجربتي كانت حساسية شديدة من الطفولة. وانحراف في الحاجز الأنفي وتضخم في الغضاريف لدرجة اني كنت بنام وانا فاتحة بقي، ودا أثر في شكل أسناني. التنفس من الأنف كان مقفول بنسبة ٩٠ في المية. سنة ٢٠١٤ جالي صداع عنيف مش بيروح بالمسكنات. واستمر ست شهور. لدرجة ضعفت ونمت في السرير. الدكتور قاللي لازم عملية. وفعلا عملت العملية. حصلتلي مضاعفات والحاجز الأنفي حصل فيه ثقب كبير. وجالي التهاب خلوي كان هيوصل للمخ لولا ستر ربنا. أخدت بسببه مضادات لمدة تلات شهور. من ضمن المضادات كان سيبروباي، بعد أربع أيام منه لقيتني بقيت واحدة تانية. كأني كبرت ٢٠ سنة. جسمي كله بيوجعني. وداني بتوش. ضعف شديد. لما قريت لقيت دي أعراض تسمم الفلوكساسين. اللي صعب جدا جدا تتعالج. لحد النهاردة وداني بتوش. (بلاش فلوكساسين أو فلوروكينولون يا جماعة).
بعد المآسي دي نيجي لجزئية الفيتامينات بأه. وقت الالتهاب الخلوي رحت لدكتور كبير، قاللي علشان الالتهاب يروح خدي فيتامينات بتركيزات عالية. فيتامين a,e,c,d .. وقتها مصدقتش وقلت فيتامينات إيه أنا بموت، والمضادات بقالها تلات شهور معملتش حاجة. بس بدأت آخد فيتامين e على مضض. بالوقت خلص الالتهاب وربنا ستر.
من حوالي سنتين بدأت بأه أركز في موضوع الفيتامينات والعناصر، لعلها تعالجني من تسمم الفلوكساسين اللي دمرلي صحتي. وفعلا عملت تحليل فيتامين د وطلع نسبته ٧. بدأت أواظب على الفيتامين. لحد ما النسبة بقت ٧٨. وحسيت بفرق كبير في صحتي. بالتدريج بدأت أصلح حاجة حاجة. أخدت مالتي فيتامين، اتحسنت أكتر، السنة دي قريت إن المغنيسيوم مهم لتسمم الفلوكساسين. ملقيتش نوع نضيف في مصر للأسف، كلهم أوكسيد مغنيسيوم ودا امتصاصه ٤ في المية بس. طلبت مغنيسيوم من أمريكا وبدأت أواظب عليه. كمان جبت عصارة خضار وفواكه. وبقيت أعمل عصير فريش خمس أيام في الأسبوع. جزر على لمون على تفاح على خيار.. وأي خضار ينفع يتعصر.كمان أخدت مصل الانفلونزا بتاع الموسم.
نتكلم في النتايج بأه. بعد ما كنت يوميا لازم دوا الحساسية، وصداع باصحى عليه الصبح، وباخد مسكنات مثلا أربع أيام في الأسبوع، صيف شتا. دلوقت بحمد الله وفضله بطلت أدوية الحساسية تماما. وبطلت المسكنات. الصداع اختفى بنسبة ٩٠ في المية. لسه للأسف بعض آثار تسمم الفلوكساسين زي آلام الأعصاب الطرفية، بس عندي أمل تقل بالوقت. كمان حاجات تانية ملهاش علاقة بالحساسية، كان بتجيلي صدفية كل شتا. اختفت تماما بقالها سنتين. بشرتي اتحسنت، شعري مكنش بيطول بقى يطول وبقى صحي جدا. التركيز اتحسن جدا.
ف بعد الحدوتة الطويلة دي، ياريت يا جماعة نهتم بالعناصر اللي نقصانا. وقبل ما نشتكي من الحساسية نتأكد إن أجسامنا سليمة ومش ناقصها حاجة. وإن تغذيتنا نضيفة قدر الإمكان. حتى لو الفيتامينات مش بتأثر على الحساسية زي ما بعض الناس بتقول، لكن مننساش إن جزء كبير من عوامل زيادة أعراض الحساسية هي الالتهابات. ودي ممكن جدا تقل بالفيتامينات والعناصر السليمة. جربوا وإدوا نفسكم فرصة ست شهور كدا. هتلاقوا فرق رهيب. بدل مانعالج الأعراض وبس، نساعد أجسامنا اللي ربنا إدالها قدرة كبيرة على التعافي.
وربنا يشفي الجميع